Ndalimi i shitjes së armëve britanike për Izraelin nëse ai fillon një sulm tokësor në Rafah, në Rripin e Gazës, do të forconte Hamasin, tha të dielën Sekretari i Jashtëm britanik David Cameron. Izraeli urdhëroi palestinezët të largoheshin nga qyteti jugor të shtunën, si një tregues se po vazhdon përpara me planet e tij për një sulm tokësor, pavarësisht kërcënimit të Presidentit amerikan Joe Biden për të ndaluar furnizimin me disa armë nëse e bën këtë. Cameron tha se ai nuk e mbështet një operacion në Rafah në mungesë të një plani për të mbrojtur qindra mijëra civilë të strehuar në qytetin kufitar jugor. Megjithatë, Britania ishte në një "pozicion krejtësisht të ndryshëm" nga Shtetet e Bashkuara për sa i përket ofrimit të armëve për Izraelin. “Herën e fundit që më kërkuan ta bëja këtë, vetëm disa ditë më vonë pati një sulm brutal nga Irani ndaj Izraelit, duke përfshirë 140 raketa lundrimi”, shtoi ai. Cameron tha se "përgjigja më e mirë" do të ishte që Hamasi, i cili kontrollon Gazën, të pranonte një marrëveshje për lirimin e pengjeve. “Nëse ne do të ndryshojmë qasjen tonë ndaj eksporteve të armëve në Izrael, do të forconim Hamasin, do ta bënim një marrëveshje për pengjet akoma më pak të mundshme dhe nuk mendoj se kjo është dicka e mirë”, tha ai.