Britania duhet të jetë gati për të luftuar dhe për të fituar një luftë kundër shteteve me forca ushtarake të përparuara, tha kryeministri Keir Starmer, ndërsa qeveria e tij njoftoi një plan prej 1.5 miliardë paundësh për të ndërtuar të paktën gjashtë fabrika të reja armësh dhe eksplozivësh. Paralajmërimi i Starmer erdhi një ditë para se ai të publikojë një përmbledhje të gjerë të aftësive ushtarake të Britanisë. Mbretëria e Bashkuar dhe vendet në të gjithë Evropën po përpiqen me shpejtësi të rrisin industritë e tyre të mbrojtjes pasi Presidenti i SHBA-së Donald Trump tha se kontinenti duhej të merrte më shumë përgjegjësi për sigurinë e vet. "Ne po kërcënohemi drejtpërdrejt nga shtetet me forca ushtarake të përparuara, kështu që duhet të jemi gati për të luftuar dhe për të fituar", shkroi Starmer në një artikull për gazetën The Sun, të dielën, duke përmendur si shembuj pushtimin e Ukrainës nga Rusia dhe bashkëpunimin e saj me Iranin dhe Korenë e Veriut. Ministri i Mbrojtjes John Healey në anën tjetër njoftoi programin e investimeve në municione në një intervistë për BBC të dielën, duke e përshkruar atë si "një mesazh për Moskën", si dhe një mënyrë për të stimuluar ekonominë e ngadalsuar të vendit. Ministria e Mbrojtjes tha edhe se do të sigurojë deri në 7,000 armë me rreze të gjatë veprimi, të prodhuara në Britani. Investimi shtesë do të thotë që Britania do të shpenzojë rreth 6 miliardë paundë për municione, tha Ministria e Mbrojtjes.