Autoritetet britanike kanë identifikuar 700 familje shqiptare, kërkesat për azil të të cilave janë refuzuar dhe ato pritet që të riatdhesohen. Ministrja e Brendshme laburiste, Shabana Mahmood vetëm pak muaj pas marrjes së detyrës, ka prezantuar planin më të gjerë të ristrukturimit të sistemit të azilit në 40 vitet e fundit dhe në qendër të tij janë pikërisht rreth 700 familje shqiptare, të cilave u është refuzuar kërkesa për azil. Ajo tha se dëbimi i këtyre familjeve do të realizohet në bashkëpunim me autoritetet shqiptare, me të cilat, siç tha zyrtarja britanike, Londra ka një bashkëpunim të lartë. Masat kanë shkaktuar shqetësim edhe brenda vetë Partisë Laburiste, që pranojnë se deportimi i fëmijëve dhe familjeve konsiderohet “i dhimbshëm dhe politikisht delikat”. Pavarësisht se Shqipëria vlerësohet nga Mbretëria e Bashkuar si një partner i besueshëm në rikthimin e shtetasve, vendi ynë është rikthyer në qendër të debatit britanik për migracionin.