Pjesë të mëdha të Evropës Perëndimore u përvëluan sërish të enjten, me Britaninë dhe Francën që hynë në valët e tyre të pesta të nxehtësisë të një vere të jashtëzakonshme që kërcënon të thyejë edhe më shumë rekorde. Meteorologët në Mbretërinë e Bashkuar parashikojnë se zhiva do të ngjitet deri në 38 gradë Celsius në Anglinë qendrore dhe juglindore, duke e bërë potencialisht ditën më të nxehtë të vitit. Temperatura më e lartë këtë vit u regjistrua më 26 qershor kur temperatura arriti 38 gradë Celsius në Anglinë lindore. Ndërkohë, temperaturat në Francë parashikohen të shkojnë edhe më lart, duke arritur në 40 gradë Celsius në zonat qendrore dhe jugore dhe 38 gradë Celsius në Paris. Kjo verë ka treguar se si Britania ashtu edhe Franca nuk janë të pajisura mirë për t'u përballur me këto nivele vape. Ajri i kondicionuar është diçka e rrallë jashtë dyqaneve dhe zyrave, për shembull. Në Britani, puna ishte veçanërisht e vështirë në spitale, të enjten, ku infermierët u rrëzuan në tokë nga lodhja nga vapa, sipas Kolegjit Mbretëror të Infermierisë. Ashtu si shumë pjesë të Evropës, Britania dhe Franca po përballen me thatësira të mëdha që kanë dëmtuar të korrat dhe kanë tharë lumenjtë, duke shtuar presionin mbi burimet ujore për familjet, bujqësinë dhe mjedisin, dhe duke i detyruar qeveritë dhe përdoruesit e ujit të kërkojnë masa afatshkurtra dhe afatgjata për të zbutur efektet e ndryshimeve klimatike të shkaktuara nga njeriu. E ndërkohë, me tokën e tharë dhe pa shenja shiu në horizont, autoritetet në Britani dhe Francë mbeten në gatishmëri të lartë për zjarret.