Në kohën kur jugu i Italisë është përfshirë nga valët e të nxehtit ekstrem, me temperaturat që kanë shkuar deri në 47 gradë Celcius në Siçili, në verilindje të ‘çizmes’, një stuhi breshëri e dhunshme ka goditur rajonin e Venetos. Në Trentino janë shkatërruar disa hektarë pyje, ndërsa në Montebelluna, Cornuda, Crocetta del Montello dhe Pederobba ka rënë breshër, kokrra e të cilit kishte madhësinë e një topi tenisi. Stuhia e breshërit goditi disa zona të famshme për vreshtarinë në Prosecco, ndërsa në zonën e Bellunos dëmet e shkaktuara nga erërat e forta dhe shiu ishin të mëdha. Zjarrfikësit kanë qenë të angazhuar gjatë gjithë natës në ndihmë të banorëve ndërkohë që janë regjistruar me qindra telefonata për ndërhyrje si pasojë e stuhive të fuqishme të shiut, breshrit dhe erës. Ekipe nga Venecia, Treviso, Padova, Vicenza dhe Verona janë angazhuar në operacionet e emergjencës ndërkohë që po punohet edhe për pastrimin e pemëve të rrëzuara dhe materialeve të tjera nëpër rrugë. Mbrojtja civile italiane po ashtu ka lëshuar një paralajmërim për mot ekstrem edhe në Trentino Alto Adige.