Tronditet sërish qyteti i Pogradecit. Mëngjesin e sotëm, rreth orës 05:00 është qëlluar me armë zjarri në drejtim të parkingut të hotelit “Voloreka” në Tushemisht. Bëhet e ditur se është qëlluar me kallashnikov drejt makinave luksove që ndodheshin të parkuara. Fatmirësisht nuk ka persona të lënduar, por janë dëmtuar 8 automjete si dhe janë thyer disa xhama të hotelit. Autorët janë larguar në këmbë nga vendngjarja për afro një kilometër. Dyshohet se të shtënat kanë qenë një paralajmërim, ndonëse pronari ka deklaruar në polici se nuk ka konflikte me asnjë. Ndërkohë policia në vendin e ngjarjes ka mundur të marrë disa prova nga kamerat e sigurisë për të zbardhur ngjarjen. Nga të dhënat e para mësohet se autorët kanë lëvizur me dy makina, të ndihmuar nga të tjerë persona dhe që pas krimit janë larguar në dy drejtime të ndryshme për të humbur gjurmët. Një roje i një objekti aty pranë është marrë në pyetje, por deri më tani nuk është siguruar asnjë e dhënë që mund të cojë në identifikimin e autorit, apo autorëve.