Evropa është gjithnjë e më e ndjeshme ndaj ngjarjeve ekstreme të motit. Dhe të dhënat konfirmojnë se stuhitë e breshërit në shumë vende janë rritur në frekuencë dhe intensitet, pjesërisht për shkak të efekteve të ndryshimeve klimatike. Stuhia e fundit që goditi Milanon, në Itali, duke habitur edhe fansat e artistit portorikan Bad Bunny, i cili u detyrua të anulonte koncertin e tij, është vetëm prova e fundit e kësaj dhe është pjesë e një trendi shumëvjeçar që shkencëtarët po e monitorojnë me shqetësim. Sipas të dhënave të mbledhura dhe të analizuara nga Laboratori Evropian i Stuhive të Rënda, mundësia për të parë stuhi breshëri me kokrriza breshëri të përcaktuara si "shumë të mëdha", me diametër mbi 5 centimetra, është afërsisht tre herë më e lartë sot sesa ishte në vitet 1950. Italia Veriore në veçanti është rajoni që kohët e fundit ka parë rritjen më të ndjeshme të ngjarjeve të motit ku janë regjistruar kokrriza të mëdha breshëri. Por si formohet breshëri gjigant? Në përpjekje për të dhënë një shpjegim shkencor, ekspertët thonë se temperaturat gjithnjë e më të larta në Detin Mesdhe janë një faktor: ndërsa uji avullon, atmosfera e poshtme mbushet me sasi të mëdha ajri të ngrohtë dhe lagështie. Megjithatë, kjo rrjedhë përplaset me efektin barrierë të maleve. Kështu, kur kjo masë ajri e paqëndrueshme takohet me relievin alpin, ajo shtyhet dhunshëm lart, duke shkaktuar një seri rrymash të konsiderueshme. Në lartësi të mëdha, takimi me erëra të ftohta dhe intensive gjeneron stuhi me lëvizje rrotulluese. Sa më intensiv të jetë ajri i ngrohtë nga poshtë, aq më shumë kokrrat e akullit mbahen në ajër, duke vazhduar të enden dhe të grumbullojnë shtresa uji të ngrirë para se të bien në tokë për shkak të gravitetit. Megjithatë, nëse "kokrra" has përsëri një rrymë mjaftueshëm të fuqishme, fenomeni do të përsëritet, duke formuar kështu kokrra gjithnjë e më të mëdha dhe më të rrezikshme. Sipas të dhënave, rekordi historik për diametrin e një kokrre breshëri është shënuar në Pordenone, të Italisë, ku më 24 korrik 2023, ra një kokërr breshëri me një diametër rekord prej 19 centimetrash, më i madhi i dokumentuar ndonjëherë në Evropë. Rekordi botëror, megjithatë, i përket qytetit Vivian, në Dakotën e Jugut, ku në vitin 2010 një kokërr akulli e rënë nga qielli e kishte diametrin 20.3 centimetra.