Një apartament i përshtatur për ushtrim prostitucioni në Shkodër është zbuluar nga Policia gjatë operacionit “Rent house”. Gjatë operacionit u arrestuan dy persona si dhe nisi hetimi në gjendje të lirë për pronaren e banesës. Sipas hetimeve, apartamenti përdorej nga një shtetase braziliane 23 vjeçe, e cila e kishte marrë me qira dhe e kishte shndërruar në ambient për ushtrim prostitucioni. Ajo u arrestua në flagrancë gjatë kontrolleve të Policisë. Në pranga u vu edhe 28 vjeçar, i kapur brenda apartamentit, ndërsa gjatë veprimeve procedurale u dokumentua edhe aktiviteti i paligjshëm i lojërave të fatit që ai ushtronte. Policia sekuestroi një shumë parash të dyshuar të përfituar nga prostitucioni, si dhe 3 aparate celularë që përdoroheshin për komunikim dhe organizim të aktivitetit. Gjithashtu është proceduar penalisht administratorja e apartamentit, e dyshuar për veprën “Mbajtja e lokaleve për prostitucion”. Ky nuk është rasti i parë që shtetase të huaja vijnë në Shqipëri për të ushtruar prostitucionin. Më herët janë zbuluar edhe raste të ngjashme me shtetase kineze dhe braziliane në Tiranë, Vlorë, Durrës dhe Elbasan.