Deputeti i Partisë Socialiste, Erion Braçe ka reaguar për zërat se ka pasur një përplasje kryeministrin Edi Rama gjatë mbledhjes së Grupit Parlamentar të PS-së dhe kabinetit qeveritar këtë të premte. Ai e ka cilësuar si të pavërtetë këtë ndodhi dhe mohoi të jetë nxjerrë jashtë nga mbledhja, duke sqaruar se është larguar vet. BRACE SINKRON “Dje para se të nisja të flisja, u kërkova kolegëve të mos nxirrnin përjashta asgjë nga ato që unë do flisja aty. Ja që ndodhi kjo që lexova, madje edhe e transformuar. Tani meqë dje u mor një angazhim për të bërë shembull njërin ndër ata që nxjerrin fjalët e shtëpisë për të vrarë politikisht tjetrin atje matan, unë mezi pres që të mbahet fjala. Pra të bëhet shembull. Mua nuk më ka nxjerrë kërkush përjashta nga mbledhja e grupit parlamentar të Partisë Socialiste. S’ka se si. Nuk ka. Unë jam ulur pasi nuk kam pasur më çfarë të me them, dhe pasi kam thënë aty, dhe jo vetëm në këtë mbledhje, po edhe në mbledhjet paraardhëse shumë më gjatë e shumë më me argumenta se sa në këtë mbledhje, gjithçka që thonë socialistët prej një viti, dhe unë i dëgjoj prej një viti këtu në Tiranë. Kam dalë jashtë pasi mbledhja ka qenë e ndërprerë dhe natyrisht kam dalë jashtë vetë, pasi s’kisha më çfarë të dëgjoja. Kjo është e vërteta’ Braçe u shpreh i revoltuar, duke kërkuar që kushdo që ka nxjerrë atë që ai ka thënë në mbledhje me dyer të mbyllura, për të dëmtuar politikisht kolegët, duhet të mbajë përgjegjësi.