Gjykata e Posaçme shpalli të pafajshëm deputetin Erion Braçe, i paditur më herët nga një biznesmen me akuzën e shpifjes. Debati në seancën e fundit të këtij procesi u zhvillua rreth interpretimit të fjalëve ‘zengjin’ dhe ‘aga’, që deputeti Erion Braçe ka shqiptuar në deklarata publike në rrjetet sociale dhe Kuvend kundër privatizimit të një toke për ndërtim parku fotovoltaik në Lushnje. Braçe ngriti pretendime se privatizimi i tokës ishte bërë në shkelje të ligjit, teksa në gjykatë u qëndroi deklaratave, duke thënë se qëllimi i tij si deputet është mbrojtja e interesit publike. Edhe Prokuroria e Posaçme tha në këtë proces se fjalët ‘zengjin’ dhe ‘Aga’ nuk përbëjnë shpifje, por janë thënë prej Braçes në cilësinë e deputetit me qëllim ndërgjegjësimin e publikut për një kauzë që ai e besonte të drejtë.