Kina ka paralajmëruar kundër ndërhyrjes në çështjet e saj të brendshme dhe kundër konflikteve të mëtejshme, ndërsa tensionet rajonale janë rritur. “Bota sot qëndron përballë një tjetër udhëkryqi: paqe apo luftë, dialog apo konfrontim”, tha ministri kinez i Mbrojtjes, Dong Jung, gjatë ceremonisë hapëse të forumit Shiangshan në Pekin, të enjten. Ai tha se Tajvani është pjesë e Kinës, duke shtuar se Ushtria e Kinës është e fuqishme dhe e aftë të sigurojë dhe mbrojë “ribashkimin”. Pekini kurrë nuk do të lejojë që përpjekjet e Tajvanit për pavarësi të kenë sukses, tha Dong. Ai shtoi se Kina është e përgatitur të zmbrapsë çdo “ndërhyrje të huaj ushtarake” në çdo kohë, duke mos përmendur emra shtetesh që sipas tij mund të bënin një ndërhyrje të tillë. Tajvani, shtëpi e 23.4 milionë banorëve, ka qeveri të veten që nga viti 1949. Megjithatë, Kina pretendon se ai është pjesë e territorit të saj dhe shpesh kërcënon se mund ta marrë atë, duke mos e përjashtuar as përdorimin e forcës. Shtetet e Bashkuara, mbështetësi kryesor i Tajvanit, janë ligjërisht të detyruara të mbështesin kapacitetet mbrojtëse të ishullit që vetëqeveriset, sipas Ligjit për raporte me Tajvanin të vitit 1979.