Qeveria ruse kërkon që të destabilizojë Bashkimin Evropian dhe anëtarët e tij. Kështu deklaroi përfaqësuesi i lartë i BE-së për Punët e Jashtme dhe Politikën e Sigurisë Josep Borrell. Sipas tij, BE duhet të flasë me një zë ndaj Rusisë, me të cilën nuk beson se mund të ketë përmirësim të marrëdhënieve së shpejti. “Rusia nuk dëshiron të flasë me Bashkimin Evropian, ajo preferon të flasë drejtpërdrejt me disa anëtarë që janë të rëndësishëm në sytë e saj. BE duhet të tregojë unitet në mënyrë që ta detyrojë Rusinë të flasë me të”, tha Borrell. Ai paraqiti të mërkurën një dokument mbi marrëdhëniet e BE-së me Rusinë me rekomandime se si të përmirësohet zbatimi i politikës evropiane ndaj Rusisë. Krerët e vendeve anëtare të BE-së do të diskutojnë këto rekomandime në një samit javën e ardhshme. “Nëse vendet anëtare i miratojnë këto rekomandime, ata do të duhet të sigurojnë që ato të ndiqen dhe të mos lejojnë që Rusia të na ndajë”, tha Borrell. Ai theksoi se marrëdhëniet e mira midis BE-së dhe Rusisë nuk duhet të priten shumë shpejt. “Në rrethanat aktuale, një partneritet i ri midis Rusisë dhe BE-së, i cili do të lejojë një bashkëpunim më të ngushtë, duket një e ardhme e largët”, pohoi ai.