Shefi për Politikë të Jashtme i Bashkimit Evropian, Josep Borrell, e nisi vizitën e tij në Moskë, duke thënë se ndalimi i kritikut të Kremlinit, Aleksei Navalny dhe shtypja e protestave kundër qeverisë, I kanë cuar marrëdhëiet e bllokut me Rusinë “në një pikë të ulët”. Në takimin me ministrin e Jashtëm rus, Sergei Lavrov, shefi I diplomacisë europiane tha se “marrëdhënia jonë është në moment të vështirë”, duke dhënë shenja se çfarë mund të pritet më tej në vazhdimin e vizitës së tij tre ditore. Shtetet europiane e kanë dënuar ashpër burgosjen e Navalnyt dhe përgjigjjen e Rusisë ndaj protestave kundër Kremlinit. Disa prej vendeve të bllokut Evropian, bashkë me Shtetet e Bashkuara, kanë kërkuar lirimin e 44-vjeçarit, i cili i ka mbijetuar një helmimi me agjent nervor në gusht të vitit të kaluar. “Ia kam shprehur ministrit Lavrov shqetësimin tonë të thellë dhe kam përsëritur thirrjet tona për lirimin e tij dhe për nisje të hetimeve për helmim”, u tha Borrell gazetarëve pas raundit të parë të bisedimeve. Lavov, është shprehur se duhen rishikuar marrëdhëniet Rusi-BE. “Për Rusinë, Bashkimi europian nuk është partner i besueshëm”, ka thënë Lavrov. Ndërkohë që zyrtarët rusë kanë akuzuar Perëndimin për ndërhyrje, Borrell e kishte pohuar që përpara nisjes në Moskë se vizita e tij “ nuk është ndërhyrje në çështjet e brendshme”, por është bazuar në “parimin universal dhe përkushtimin ndërkombëtar”.