Nafta dhe benzina do të mund të blihen më lirë në pikat e karburanteve, duke pasqyruar edhe luhatjet në bursat ndërkombëtare. Bordi i Transparencës vendosi të ulë me tre lekë çmimin e tregtimit të naftës, ndërsa benzina pati një reduktim në çmim prej pesë lekësh. Në mbledhjen e kësaj të enjte, u vendos që në pikat e tregtimit me pakicë, nafta të shitet jo më shumë se 187 lekë për litër, duke ndjekur një trajektore rënëse në çmim, krahasuar me 190 lekë për litër që ishte më herët. Ndërkohë me shumicë çmimi i naftës u ul në 175 lekë për litër, nga 178 lekë për litër që ishte më herët.