Dy persona janë shpallur të zhdukur në Itali të premten, pasi stuhia jashtëzakonisht e rëndë pranverore në Alpe lëshoi më shumë se një metër borë në disa zona, duke mbyllur pistat e skive, duke ndaluar transportin dhe duke lënë të paktën një person të vdekur. Stuhia mbylli rrugët, ndaloi trenat dhe ndërpreu energjinë në zona të gjera në Francë, Itali dhe Zvicër. Edhe pse bora në prill nuk është e rrallë në Alpe, sasia që ra në vetëm disa orë ishte e pazakontë dhe i befasoi autoritetet dhe banorët. Në Itali, një 92-vjeçar u gjet i vdekur nga zjarrfikësit në shtëpinë e tij të përmbytur, në rajonin verior të Piemontes, tha brigada e zjarrfikësve. “Zjarrfikësit vazhdojnë kërkimet për dy të zhdukur”, thuhej më tej në njoftim. “Sipas informacioneve paraprake, një baba dhe djali i tij janë marrë me vete nga uji pranë shtëpisë së tyre” në Vicenza. Shiu "intensiv" goditi veriun e Italisë, duke u kthyer në borë në lartësinë mbi 1,800 metra, tha shërbimi i motit i forcave ajrore italiane. Në vendpushimin francez Val Thorens, një grua pësoi një atak në zemër pasi mbeti e përfshirë nën një ortek, thanë autoritetet. Dhe në Tignes, autoritetet urdhëruan banorët të qëndrojnë në shtëpi pasi më shumë se 1.1 metra borë ra gjatë natës. "Të gjitha makinat janë të mbuluara deri në çati... Vetëm të dalësh jashtë është shqetësuese", thonë banorët. Rreziku i ortekëve u rrit në nivelin maksimal në disa rajone, duke cuar në mbylljen e disa zonave të skijimit.