Pas reshjeve të dendura të borës në zonat e thella të vendit, Forcat e Armatosura dhe Agjencia Kombëtare e Mbrojtjes Civile u kanë shkuar në ndihmë njerëzve të bllokuar. Njoftohet se pjesëtarë të Forcave të Armatosura u ngjitën në Malin e Korabit në kushte shumë të vështira atmosferike për të shpëtuar tre banorë, bashkë me 30 krerë kuaj të bllokuar. Sakaq pas koordinimit të strukturave të Mbrojtjes Civile të mbështetura nga Forcat e Armatosura, iu është dhënë ndihma banorëve në kushte shumë të vështira për shkak të temperaturave të ulëta dhe dëborës që arrinte deri në 40 centimetra. Ministria e Mbrojtjes njofton se në këtë operacion morën pjesë 19 forca dhe 3 mjete nga Batalioni i tretë i Regjimentit të Këmbësorisë së Veriut, të cilët finalizuan me sukses misionin në rreth 2100 metra lartësi.