Kina, Irani dhe disa shtete arabe kanë dënuar deklaratën e një ministri izraelit, i cili tha se hedhja e një bombe bërthamore në Rripin e Gazës ishte një opsion në luftën Izrael-Hamas, duke e quajtur këtë qëndrim si kërcënim për botën. Në konferencën e së hënës në Kombet e Bashkuara, qëllimi i së cilës ishte krijimi i një zone pa armë bërthamore në Lindjen e Mesme, shumë ambasadorë dënuan dhe kritikuara deklaratat e bëra nga ministri i Trashëgimisë së Izraelit, Amihai Eliyahu, i cili më vonë i quajti deklaratat e tij si “metaforike”. Kryeministri izraelit, Benjamin Netanyahu, hodhi poshtë menbjëherë deklaratat e ministrit dhe e pezulloi atë nga pjesëmarrja në takimet e Qeverisë. Izraeli as nuk ka konfirmuar e as nuk ka mohuar se ka aftësi bërthamore. Gjerësisht besohet se ky shtet ka armë bërthamore dhe një ish-punonjës i një reaktori bërthamor u burgos për 18 vite, pasi kishte publikuar detaje dhe fotografi të arsenalit të dyshuar bërthamor të Izraelit në një gazetë britanike më 1986. Zëvendësambasadori i Kinës në OKB, Geng Shuang, tha se Pekini ishte i “tronditur” dhe i cilësoi deklaratat si “ekstremisht të papërgjegjshme”. Ai u bëri thirrje zyrtarëve izraelitë të reagojnë ndaj deklaratës dhe të bashkohen në Traktatin për Mospërhapjen e Armëve Bërthamore. Shefja për çarmatim në OKB, Izumi Nakamitsu, e cila hapi konferencën, nuk e përmendi Izraelin. Por, ajo tha se “çdo kërcënim për të përdorur armë bërthamore është i papranueshëm”. Ambasadori i Iranit, Amir Iravani, tha në anën tjetër se kërcënimet bërthamore drejtuar palestinezëve nga zyrtarë të lartë izraelitë tregojnë “krenarinë” e Izraelit për posedimin e këtyre armëve.