Avionët rusë u dëmtuan, por nuk u shkatërruan në një sulm të 1 qershorit nga Ukraina dhe ata do të riparohen, tha zëvendësministri i jashtëm rus Sergei Ryabkov në një intervistë me agjencinë shtetërore të lajmeve TASS. "Pajisjet në fjalë, siç u deklarua edhe nga përfaqësuesit e Ministrisë së Mbrojtjes, nuk u shkatërruan, por u dëmtuan. Ato do të riparohen," tha Ryabkov. Ndërkohë Shtetet e Bashkuara vlerësojnë se sulmi me dron i Ukrainës gjatë fundjavës goditi deri në 20 avionë luftarakë rusë, duke shkatërruar rreth 10 prej tyre, i thanë dy zyrtarë amerikanë agjencisë së lajmeve Reuters, një shifër kjo që është rreth gjysma e numrit të vlerësuar nga Presidenti ukrainas Volodymyr Zelenski. Megjithatë, zyrtarët amerikanë e përshkruan sulmin si shumë të rëndësishëm, me njërin prej tyre që paralajmëroi se mund ta shtyjë Moskën në një pozicion negociues shumë më të ashpër në bisedimet e ndërmjetësuara nga SHBA-ja për t'i dhënë fund më shumë se tre viteve luftë. Presidenti rus Vladimir Putin i tha Presidentit amerikan Donald Trump në një bisedë telefonike të mërkurën se Moska duhet t'i përgjigjet sulmit, tha Trump në një postim në mediat sociale. Trump shtoi se "ishte një bisedë e mirë, por jo një bisedë që do të çojë në paqe të menjëhershme". Ukraina thotë se shënjestroi katër baza ajrore në të gjithë Rusinë duke përdorur 117 mjete ajrore pa pilot të nisura nga kontejnerë afër objektivave, në një operacion të koduar "Rrjeta e Merimangës". Të mërkurën, ajo publikoi pamje që tregonin dronët e saj duke goditur bombarduesit strategjikë rusë dhe duke u ulur mbi antenat e dy avionëve ushtarakë të zbulimit A-50, nga të cilët ka vetëm pak në flotën e Rusisë.