Të paktën 11 persona, përfshirë tre fëmijë të vegjël, kanë humbur jetën nga sulmet ajrore izraelite gjatë natës në kampin e refugjatëve në Han Junis, në jug të Gazës, sipas Agjencisë për Mbrojtje Civile në këtë territor. Zëdhënësi i agjencisë, Mahmud Bassal, deklaroi se sulmet ndodhën rreth orës 03:00 të mëngjesit, duke goditur shtëpinë e një familje. Ai shtoi se tetë nga viktimat i përkisnin kësaj familjeje, përfshirë dy fëmijë njëvjeçarë dhe një foshnje vetëm një muajshe. Deri më tani, ushtria izraelite nuk ka dhënë ndonjë koment zyrtar mbi këto sulme.