Një bombardim masiv ajror rus që zgjati për më shumë se 12 orë ka vrarë të paktën katër persona dhe ka plagosur 70 të tjerë në Ukrainë. Presidenti ukrainas Volodymyr Zelensky tha se të gjitha vdekjet ndodhën në kryeqytetin, Kiev, ku ishin drejtuar shumë nga dronët dhe raketat, dhe mes viktimave ishte edhe një vajzë 12-vjeçare. Rusia lëshoi gati 600 dronë dhe disa dhjetëra raketa drejt shtatë rajoneve të Ukrainës, thanë forcat e saj ajrore. Zelensky paralajmëroi se Ukraina do të hakmerrej dhe tha se sulmi "i lig" tregoi se Moska "dëshiron të vazhdojë të luftojë dhe të vrasë njerëz". Rusia tha se goditi objektet ushtarake dhe ndërmarrjet industriale që mbështesin forcat e armatosura të Ukrainës. Breshëria e zgjatur e së shtunës në mbrëmje është një nga më të rëndat në muajt e fundit. Shërbimet e emergjencës thanë se një sulm ndaj Institutit të Kardiologjisë të qytetit vrau një infermiere dhe një pacient. Një furrë e madhe buke, një fabrikë gomash për automobilë, si dhe pallate me apartamente banimi dhe infrastrukturë civile, u vunë gjithashtu në shënjestër, tha Zelensky. Presidenti ukrainas shtoi se rajonet Zaporizhzhia, Khmelnytskyi, Sumy, Mykolaiv, Chernihiv dhe Odesa u goditën gjithashtu. Guvernatori i Zaporizhzhias, Ivan Fedorov, tha se 31 persona ishin plagosur në rajon, përfshirë tre fëmijë. Guvernatori rajonal i Sumyt tha se një burrë 59-vjeçar kishte vdekur në sulmet e natës së kaluar. Zelensky u zotua se Ukraina "do të kundërpërgjigjet" dhe tha se priste një "reagim të fortë" nga Evropa dhe Shtetet e Bashkuara. "Ky sulm i poshtër ndodhi në fund të javës së punimeve të Asamblesë së Përgjithshme të OKB-së, dhe kjo është mënyra se si Rusia deklaron qëndrimin e saj të vërtetë", tha ai. Zelensky përsëriti mbështetjen e tij për kërcënimin e Presidentit të SHBA-së Donald Trump për sanksione më të ashpra ndaj Rusisë, si dhe thirrjen e tij për aleatët evropianë për të frenuar importet e tyre të naftës dhe gazit rus.