Agjencia e mbrojtjes civile në Gazë njoftoi se forcat izraelite vranë të paktën 25 persona të enjten, përfshirë 12 në një sulm ndaj një shkolle që strehonte palestinezë të zhvendosur nga lufta që po hyn në muajin e saj të 22-të. Izraeli ka zgjeruar së fundmi operacionet ushtarake në Rripin e Gazës, ku lufta që nga tetori i vitit 2023 ka shkaktuar kushte të rënda humanitare dhe ka zhvendosur thuajse të gjithë popullsinë prej mbi dy milionë banorësh. Shumë prej tyre janë strehuar nëpër objekte shkollore, por këto objekte janë goditur shpesh nga sulme ajrore izraelite, të cilat ushtria i arsyeton duke thënë se synojnë militantë të Hamasit që fshihen mes civilëve. Të enjten në qytetin e Gazës, zyrtari i mbrojtjes civile, Mohammad al-Mughayyir, tha për AFP: “Kemi 12 dëshmorë, shumica prej tyre gra dhe fëmijë, dhe një numër i madh të plagosurish nga një sulm ajror izraelit mbi shkollën Mustafa Hafez, e cila strehon të zhvendosur, në lagjen Al-Rimal” Pamjet e AFP-së tregonin fëmijë të vegjël që endeshin nëpër ndërtesën e djegur e të shkatërruar, mes grumbujsh me mbetje të karbonizuara që ende lëshonin tym. Grupe palestinezësh po kërkonin mes rrënojave dhe mobilieve të dëmtuara që mbulonin dyshemenë.