Ish-presidenti rus Dmitry Medvedev tha të martën se anëtarët e rinj të NATO-s tani janë objektiva të mundshme për Moskën dhe në rrezik të sulmeve të mundshme hakmarrëse duke përdorur edhe armë bërthamore, në rast të një konflikti, raportoi agjencia shtetërore ruse e lajmeve TASS. Medvedev, i cili e ka cilësuar veten si një nga kundërshtarët më të hapur anti-perëndimorë të Rusisë, duket se po i referohej Suedisë dhe Finlandës, dy vendet e fundit që iu bashkuan aleancës ushtarake perëndimore. Duke folur në një aktivitet në Rusi, Medvedev theksoi se operacioni ushtarak special në Ukrainë, siç e quan Moska pushtimin dhe luftën e saj në vendin fqinj, duhet të përfundojë vetëm me fitoren e rusisë dhe përmbysjen e regjimit të Kievit, të cilin ai e quajti përsëri "neonazist". Në fjalën e tij, zëvendëskryetari i Këshillit të Sigurisë Kombëtare të Rusisë theksoi gjithashtu se Presidenti ukrainas Volodymyr Zelensky do të kishte një fund shumë të trishtueshëm pasi ai u krenua me vrasjen e gjeneralit rus Yaroslav Moskalik disa ditë më parë.