Në shikim të parë, mund të duket një zgjidhje e thjeshtë: një asteroid që kërcënon tokën hidhet në erë para se të hyjë në orbitën e planetit tonë. Nuk është madje as një ide origjinale duke patur parasysh se skenarin e kemi parë edhe në filma. Megjithatë, nuk është fantashkencë, por një projekt i konceptuar nga shkencëtarët më të mirë kinezë si pjesë e fokusit në rritje të Pekinit në mbrojtjen planetare. Gazeta South China Morning Post raportoi për iniciativën në detaje, duke shpjeguar në faqen e saj të internetit planin e zhvilluar nga një grup studiuesish nga Instituti Kinez i Kërkimeve të Raketave në Pekin. Ideja e shkencëtarëve është të përdorin dy sonda të ndryshme për të shpërthyer asteroidin: e para do të ngarkohej me gërmimin e një krateri të madh, në të cilin një anije e dytë kozmike do të depozitonte bombën bërthamore që do ta hidhte në erë trupin qiellor nga brenda. E ky do të ishte një shpërthim super i madh, me një forcë të barabartë me tre megatonë, ose ndryshe një forcë ekuivalente me 200 bomba si ajo e lëshuar në Hiroshima. Mundësitë që plani i Kinës të zbatohet në praktikë nuk janë shumë të mëdha por jo aq qesharake sa mund të mendohet. Në 2019, një asteroid me diametër afërsisht 130 metra kaloi pranë Tokës në një distancë prej 72,000 km, duke u zbuluar nga astronomët vetëm pak para afrimit të tij. Kjo e shtyu NASA-n të ndërmerrte veprime, duke kryer të vetmen provë të vërtetë të devijimit të asteroideve deri më sot në vitin 2022. Misioni DART pa që një sondë hapësinore të përplasej me një asteroid, duke arritur ta devijojë atë dhe të ndryshojë shpejtësinë e tij. Por ky rezultat, sipas ekspertëve kinezë, nuk do të arrihej në objekte më të mëdha. Ilaçi i vetëm, në një rast të tillë, do të ishte një shpërthim bërthamor.