Pas gjashtë muajsh, dhjetë deputetët serbë shfaqen për disa minuta në seancën e Kuvendit të Kosovës, që të mos u hiqen mandatet për mospjesëmarrje, dhe më pas ngrihen, largohen dhe zhduken për gjashtë muajt e ardhshëm. Hera e fundit kur u paraqitën shkurtimisht në Kuvend, ishte më 8 shkurt. Nga dhjetë vendet në kuvend, që Kushtetuta e Kosovës ia garanton komunitetit serb, nëntë i takojnë Listës Serbe, partisë më të madhe të serbëve në Kosovë, e cila ka mbështetjen e Beogradit. Deputeti i dhjetë vepron si i pavarur, por është anëtar i grupit parlamentar “Lista Serbe”. Për këtë “veprim strategjik”, siç e kanë cilësuar më herët bojkotimin e institucioneve të Kosovës, ata marrin çdo muaj pagën e deputetit, në vlerë prej rreth 1.800 eurosh. Kjo do të thotë se për këta deputetë, nga buxheti i Kosovës ndahen çdo vit rreth 200 mijë euro. Shumica e këtyre deputetëve, përveç mandateve në Kuvendin e Kosovës, kanë poste edhe në institucionet e Serbisë dhe, rrjedhimisht, të ardhura të dyfishta. Këta deputetë të Listës Serbe i morën mandatet e tyre në mes të nëntorit 2022, dhjetë ditë pasi paraardhësit e tyre dhanë dorëheqje. Në atë kohë, pati dorëheqje masive të serbëve nga institucionet e Kosovës në veri, si shenjë kundërshtimi ndaj vendimit të Qeverisë së Kosovës për të riregjistruar automjetet me targa serbe në targa të Kosovës. Megjithatë, ky vendim rezultoi të ishte i nxituar, sepse në atë rast ata do t’i humbnin vendet e tyre në Kuvend dhe ato do t’u kalonin serbëve të partive të tjera, që morën pjesë në zgjedhje.