Një avion Boeing i FedEx Airlines, u ul në aeroportin e Stambollit të mërkurën pa pajisjen e përparme të uljes dhe arriti të ndalonte në pistë, tha ministria e transportit e Turqisë, duke shtuar se fatmirësisht nuk kishte viktima në incident. Avioni Boeing 767, që ishte nisur në fluturim nga aeroporti i Parisit Charles de Gaulle (Sharl dë gol), informoi kullën e kontrollit të trafikut ajror në Aeroportin e Stambollit se pajisjet e tij të uljes nuk u hapën dhe u ul me udhëzime nga kulla, tha ministria në deklaratën e saj. Ekipet e shpëtimit dhe zjarrfikësve të aeroportit bënë përgatitjet e nevojshme në pistë para uljes, dhe askush nuk u lëndua, tha gjithashtu ministria, pa dhënë më shumë detaje për shkaqet e defektit. Pamjet video të siguruara nga agjencia e lajmeve Reuters treguan shpërthime shkëndijash dhe tym që ngrihej ndërsa pjesa e përparme e avionit gërvishte pistën, përpara se të ndërhynin zjarrfikësit. Pista ku u ul avioni i mallrave është mbyllur përkohësisht për trafikun ajror, por trafiku në pistat e tjera në aeroport po vazhdon pa asnjë ndërprerje, tha operatori i aeroportit. Vetë Boeing nuk ka bërë ende komente për këtë incident të radhës. Kompania është në telashe për shkak të një serie incidentesh me avionët e saj, dhe ka vendosur të ristrukturohet për shkak të presionit në rritje nga kompanitë ajrore, rregullatorët dhe investitorët.