Policia e Tiranës ka nisur procedimin penal ndaj 16 protestuesve dhe ka shpallur në kërkim 2 të tjerë, në lidhje me bllokimin e rrugëve gjatë protestës të zhvilluar në kryeqytet. Sipas hetimeve paraprake, këta protestues dyshohet se kanë nxitur pjesëmarrësit, përmes thirrjeve, që ta vijonin protestën përtej orarit të njoftuar nga organizatorët, 18:00–22:00, duke mos respektuar perimetrin e përcaktuar për zhvillimin e saj. Si pasojë, policia thekson se është shkaktuar bllokim i qarkullimit të mjeteve dhe pengesë në lëvizjen e qytetarëve, si dhe një pjesë e protestuesve kanë hyrë edhe në zonën “fan zone” në sheshin “Skënderbej”, e përshtatur për ndjekjen e aktiviteteve sportive, duke prishur qetësinë publike dhe duke u bërë thirrje qytetarëve të pranishëm që t’i bashkoheshin tubimit. Autoritetet po vijojnë punën për identifikimin dhe procedimin e personave të tjerë të përfshirë. Ndërkohë, dy ditë më parë nisi procedimi penal edhe ndaj 19 shtetasve të tjerë për të njëjtën ngjarje.