Pas incidentit shokues në zonën e fushëkrujës, ku persona të armatosur nga fisi Rraja ushtruan dhunë të egër fizike ndaj dy personave, policia ka vijuar me masat e saj. Në një operacion të kryer në bashkëpunim me Agjencinë Kombëtare të Burimeve Natyrore dhe Autoritetin Kombëtar për Sigurinë dhe Emergjencat në Miniera, ajo ka bllokuar një gurore që ndodhej 300 metra larg fshatit Borizanë, në njësinë administrative Thumanë të bashkisë Krujë. Gurorja kishte si administrator shtetasin Viktor Delia. Policia tha po ashtu se kishte kryer inspektime në nëntë banesa të cilat dyshohen se ishin dëmtuar nga aktiviteti i gurores. Pas verifikimeve të plota – thuhet në deklaratë – do të merren masa shtesë. Gurorja që ishte në bashkëpronësi të fisit Rraja ishte shkaku i dhunës së tmerrshme që u ushtrua ndaj Jashar dhe Bilbil Majës, banorë të Borizanës. Ata dhe të tjerë, ankoheshin se gurorja i kishte shkaktuar dëme në shtëpi si pasojë e shpërthimeve dhe për këtë shkak ata kishin paraqitur një denoncim edhe në polici. Ndërkohë që dy pjesëtarët e fisit Maja po bisedonin me inxhinierin e gurores në një lokal afër aksit rrugor Fushë Krujë-Thumanë, persona me mjete të rënda dhe të armatosur iu afruan atyre dhe nisën të dhunonin egërsisht dy kushërinjtë. Tashmë, policia ka identifikuar personat që morën pjesë në sulm dhe ka arrestuar tetë prej tyre. Gjashtë të tjerë janë në kërkim.