Mobilizimi i pjesshëm i Vladimir Putinit ka vënë në lëvizje ndryshime drastike për shumë rusë, ndërsa rezervistët e thirrur nën armë i thonë lamtumirë familjeve ndërsa të tjerë përpiqen të largohen nga vendi duke u përpjekur të cajnë kufijtë tokësorë ose të blejnë bileta avioni. Për shumë nga ata që ikin, arsyeja është e njëjtë: të evitojnë dërgimin në luftë në Ukrainën fqinje. Por rrethanat që përcaktojnë vendimet e tyre dhe vështirësitë për tu larguar, janë thellësisht personale për secilin. Për Ivanin, që dikur ka qenë oficer rezervist në rusi dhe që të enjten la vendin për të shkuar në Bjellorusi, motivimi është i qartë: Unë nuk e mbështes luftën ndaj vendosa të largohem menjëherë – tha ai për CNN. Aleksei, një 29 vjecar që mbërriti në Gjeorgji nga Rusia me autobus, thotë se vendimi i tij ishte marrë për shkak të rrënjëve. “Gjysma e familjes time është ukrainase. Unë nuk jam rezervist tani, por mendoj se shumë shpejt të gjithë do thirren nën armë”, thotë ai. Shpallja e mobilizimit të mërkurën tronditi nga rrënjët jetët e shumë rusëve. Rrjetet sociale atje po shpërthejnë me njerëzit që përpiqen ethshëm të gjejnë një mënyrë për të siguruar një vend në një mjet që shkon drejt kufirit, e me disa që thonë madje se do të nisen edhe me bicikleta. Radhë të gjata trafiku janë krijuar në pikat e kalimit kufitar me disa vende. Imazhet e mediave të kazakistanit tregojnë radhën e gjatë të makinave që presin të kalojnë. Ka nga ata që thonë se presin prej më shumë se 10 orësh në rrugë. Makina pa fund, të gjithë po ikin nga rusia.