Gjashtë persona janë vrarë dhe katër të tjerë janë plagosur në sulmet me raketa të Ukrainës në rajonin e Belgorodit në Rusi gjatë natës, tha guvernatori në detyrë. Një fëmijë 14-vjeçar ishte mes të plagosurve, shkroi Alexander Shuvaev në Telegram të hënën. Zyrtarët ukrainas në anën tjetër thanë se dy persona u vranë në sulmet me dronë rusë gjatë natës në rajonin Sumy, afër kufirit me Rusinë, i cili ka qenë nën sulme të shpeshta. Sulmet vijnë një natë pas asaj që zyrtarët rusë e quajtën sulmin "më të madh" të nisur nga Ukraina këtë vit, në të cilin u vranë të paktën shtatë persona. Sulmet ruse ndaj Ukrainës vranë gjithashtu të paktën shtatë persona dhe plagosën më shumë se 39 të tjerë të shtunën në mbrëmje. Sulmet e fundit të Ukrainës dogjën edhe një ndërtesë dhe dëmtuan një makinë në fshatin Koloskovo në rrethin Valujski, i cili është afër kufirit të Rusisë me Ukrainën. Sipas zyrtarëve, sulmi ukrainas kishte në shënjestër një strukturë industrial por ajo nuk ishte dëmtuar. Në Ukrainë, një sulm gjatë natës në qytetin port të Odesës në Detin e Zi dëmtoi një anije civile dhe plagosi katër persona.