Ish-presidenti amerikan Donald Trump do të akuzohet edhe zyrtarisht në një seancë dëgjimore të enjten, për komplot që të përmbyset rezultati zgjedhor i vitit 2020. Para nisjes së seancës, ai e ka kritikuar këtë rast dhe e ka konsideruar si dëshmi të “korrupsionit, skandalit dhe dështimit” të Shteteve të Bashkuara nën presidencën e Joe Bidenit. Trump ndërkohë përballet edhe me dy raste tjera penale, ndërsa bën fushatë për të fituar nominimin e republikanëve për zgjedhjet e ardhshme presidenciale. Siguria është rritur në Uashington, në prag të nisjes së seancës. Aparate metal-detektor janë vendosur jashtë ndërtesës së gjykatës, ku do të lexohen zyrtarisht akuzat kundër Trumpit. Fortifikime të tjera janë vënë edhe rreth ndërtesave të Kongresit amerikan, ku mbështetësit e Trumpit shkaktuan trazira në janar të vitit 2021, të zemëruar me rezultatin zgjedhor. Shërbimi Sekret, i cili ofron mbrojtje për presidentët dhe ish-presidentët, e ka lëshuar një paralajmërim për publikun se mund të ketë bllokime në trafik në qendër të Uashingtonit. Është raportuar të jetë rritur edhe mbrojtja për gjyqtarët e përfshirë në këtë rast. Trump, 77-vjeçar, pritet të dalë para gjykatës, por të deklarohet i pafajshëm. Ndonëse e ka mundësinë e paraqitjes në gjyq edhe përmes video-lidhjes, ai pritet të dalë në seancë fizikisht. Trump ka qenë në Uashington vetëm një herë pasi është larguar nga Shtëpia e Bardhë. Radha e njerëzve të mbledhur për ta parë atë ndërsa hyn në ndërtesë, ka nisur tashmë të rritet.