Agjencia e Administrimit të Pasurive të Sekuestruara dhe Konfiskuara raportoi një rritje të ndjeshme të të ardhurave nga qiradhënia e pasurive nën administrim gjatë nëntëmujorit të parë të vitit 2025. Sipas të dhënave zyrtare, 162 milionë lekë janë arkëtuar deri në fund të shtatorit, krahasuar me 110 milionë lekë në të njëjtën periudhë të një viti më pare. Shifrat tregojnë një rritje me 48 për qind. Muaji shtator ka rezultuar më i miri i vitit, me 22.4 milionë lekë të ardhura, gati 49 për qind më shumë se shtatori i vitit të kaluar. Sipas agjencisë, kjo ecuri është nxitur nga formalizimi i kontratave të reja të qirasë, veçanërisht gjatë muajve mars, korrik dhe shtator. Nëse trendi aktual vijon, të ardhurat vjetore pritet të kalojnë 200 milionë lekë, duke shënuar rekordin më të lartë historik në administrimin e pasurive të sekuestruara dhe konfiskuara. Por përtej shifrave, Agjencia thekson se po fokusohet gjithnjë e më shumë në përdorimin social të pasurive të konfiskuara, në bashkëpunim me bashkitë dhe organizatat sociale, për t’i kthyer asetet në shërbim të komunitetit.