Kriptomonedha Bitcoin ka arritur për të parën herë vlerën mbi 60 mijë dollarë duke vijuar kështu thyerjen e rekordeve. Bitcoin, vlera e të cilës është tre fishuar që nga fundi i vitit të kaluar, është fuqizuar nga kompani të njohura që po e adoptojnë atë si metodë pagese. Por, disa analistë thonë se kjo rritje më e fundit erdhi pjesërisht për shkak të paketës së jashtëzakonshme stimuluese që u miratua në shba këtë javë. Vlera totale në treg e Bitcoinit, muajin e shkuar, e kapërceu shifrën 1 trilionë dollarë. Sidoqoftë, Bitcoin ka patur edhe shumë luhatje dhe vlera e saj ka rënë dhe është ngritur shpesh që kur ajo u krijua në 2009. Në shkurt, Elon Musk tha se prodhuesja e tij e makinave elektrike, Tesla, kishte blerë bitcoin në vlerë 1.5 miliardë dollarë dhe se do ta pranonte kriptomonedhën si mënyrë pagese për makinat e saj në të ardhmen. Mastercard po ashtu planifikon të pranojë disa kriptomonedha si formë pagese ndërsa Black Rock, menaxhuesja më e madhe në botë e aseteve, po eksploron mënyrat se si mund të përdorë monedhën digjitale. Pandemia e koronavirusit ka luajtur rolin e saj në rritjen e Bitcoinit ndërsa gjithnjë e më shumë njerëz i kanë bërë blerjet e tyre online, duke u larguar akoma më shumë nga monedhat fizike dhe kartmonedhat.