Shpërthimi i fuqishëm në kanalin e Ibër Lepencit në Zubin Potok që solli dëmtim të madh të infrastukturës që furnizon me ujë disa qytete si dhe të korporatës energjetike, ka sjellë reagime të ashpra në radhët e politikës së Kosovës. Zëvëndës kryeministri Besnik Bislimi mbajti të njëjtin qëndrim me Albin Kurtin, duke drejtuar gishtin nga Serbia, si përgjegjëse për aktin terrorist, sic e kanë cilësuar ata më herët. Në një reagim në rrjetet sociale, Bislimi akuzoi shtetin serb se duke u distancuar nga sulmi, po vepron njësoj si në rastin e Banjskës. “Presidenti i Serbisë Aleksandër Vuçic, sot tha që nuk deshi të nxitohej në distancim të hershëm. Ndërkohë, kështu kanë thënë edhe për sulmin në Banjskë të Zveçanit, kur vranë rreshterin e policisë sonë, Afrim Bunjakun. Janë distancuar por ende e mbështesin dhe financojnë Milan Radoiçic, i cili qarkullon nëpër Serbi dhe planifikon e organizon sulme mbi Kosovën nga ana tjetër e kufirit.” Bislimi tha se krahu i djathtë i Milan Radoiçic, Nemanja Radivojevic Gandi dyshohet të jetë përgjegjës për këtë sulm. “Dora e djathtë e tij, Nemanja Radivojevic - Gandi, është i dyshuari për sulmin me granatë dore në stacionin e policisë në Zveçan më 26 nëntor 2024, e që bashkë me sulmin në ndërtesën e komunës atje më 28 nëntor 2024, i paraprinë sulmit terrorist e kriminal ndaj infrastrukturës kritike, që na mundëson ftohjen e termocentraleve që prodhojnë energjinë elektrike dhe furnizimin me ujë, të disa komunave të Kosovës, përfshirë një pjesë të kryeqytetit Prishtinës”.