Në mesazhin e tij në rrjetet sociale, me rastin e ndërrimit të viteve, zv.kryeministri i Kosovës Besnik Bislimi solli në vëmendje ngjarjet në veri të vendit. Ai evidentoi qasjen aspak fqinjësore të Serbisë dhe fushatat e saj për të frikësuar gazetarët, apo sulmet ndaj ushtarëve të misionit të NATO-s, KFOR. “Qasja e fqinjit tonë verior, u bë dhe më agresive këtë vit, kur zhvilluan fushata të frikësimit ndaj qytetarëve për bojkotimin e zgjedhjeve të prillit, sulmuan institucionet tona në veri, KFOR-in dhe gazetarët përmes grupimeve kriminale, rrëmbyen tre zyrtarë tanë policor brenda territorit të Republikës sonë dhe organizuan një akt agresioni e ushtarak, me qëllim aneksimin e veriut e destabilizimin e rajonit ku vranë dhe rreshterin e heroin Afrim Bunjaku”, ka thënë ai. Zëvendës-kryeministri i Kosovës bëri edhe një apel për ndërkombëtarët, që të dënojnë sulmet paramilitare serbe më 24 shtator në Banjskë të Zveçanit. “Në 2024, duhet reagim më vendimtar edhe nga ana e BE-së në dënimin e agresionit në Banjskë, qasjes shkallë-shkallë gjithnjë më eskaluese të Serbisë dhe mungesën e konstruktivitetit nga ana e tyre në dialog”, ka shkruar ai. Bislimi mbylli mesazhin e tij, duke theksuar punën e mirë të qeverisë për liberalizimin e vizave dhe hapat e parë drejt anëtarësimit në BE.