Irani tha se do të kryejë një stërvitje të madhe ushtarake me kinën dhe rusinë, brenda pak javësh, si përgjigje ndaj lojërave të luftës që nato ka nisur tashmë në evropë. Admirali Shahram Irani, komandant i marinës iraniane, tha se stërvitja e përbashkët detare do të mbahet para fundit të marsit dhe do të ketë si qëllim rritjen e sigurisë rajonale. Vendi ku do të mbahen këto manovra nuk është konfirmuar ende por me gjasë mund të jetë gjiri i Omanit, ku flotat detare të të tre vendeve kanë kryer stërvitje marsin e vitit të kaluar. Sipas agjencisë iraniane të lajmeve, vende të tjera janë ftuar të marrin pjesë në stërvite, si vëzhgues. Stërvitja është quajtur Cerberus, sipas qenit me tre koka që ruan portat e ferrit në mitologjinë greke. Dhe emri i zgjedhur nuk është i paqëllimshëm. Lideri suprem i iranit, Ali Khamenei, lideri kinez Xi Jin Ping dhe presidenti rus Vladimir Putin, ndajnë një armiqësi të hapur me perëndimin dhe janë etiketuar edhe si aksi i të keqes. Kjo ndodh ndërsa nato ka nisur stërvitjen më të madhe ushtarake të saj që nga lufta e ftohtë, në mesin e tensioneve në rritje në arenën ndërkombëtare. Steadfast Defender 2024 ka nisur tashmë në një hapësirë prej mijëra kilometrash katror në evropë, ndërkohë që armata, flota avionësh luftarakë dhe 90 mijë trupa kryejnë operacione tokësore, detare, ajrore, kibernetike dhe hapësinore. 32 vende janë bashkuar në këtë stërvitje, për tu përgatitur për një sulm të mundshëm të rusisë në evropë.