Udhëheqësi suprem i Iranit, Ayatollahu Ali Khamenei, tha të premten se përvoja kishte vërtetuar se bisedimet me Shtetet e Bashkuara nuk janë "të zgjuara, dhe as të ndershme". Këtë javë, presidenti i SHBA-së, Donald Trump tha se do të dëshironte të punonte për një "marrëveshje të vërtetë të paqes bërthamore" me Iranin, pasi të rikthente fushatën e tij të presionit maksimal ndaj vendit islamik. Gjatë mandatit të tij të mëparshëm në detyrë në vitin 2018, Trump tërhoqi Shtetet e Bashkuara nga pakti bërthamor i Teheranit, i vitit 2015, me fuqitë botërore dhe rivendosi sanksionet që kanë gjymtuar ekonominë e Iranit. Masat e ashpra e shtynë Teheranin të shkelte kufizimet bërthamore të paktit. "Negocimi me Amerikën nuk është as i zgjuar, as i mençur, as i ndershëm. Nuk do të zgjidhë asnjë nga problemet tona. Këtë e them nga përvoja", tha Khamenei. Irani kishte arritur marrëveshjen e tij me SHBA-në dhe vendet e tjera pas dy vitesh bisedime, tha ai, por amerikanët nuk iu përmbajtën asaj pavarësisht lëshimeve të shumta të Iranit. “Personi përgjegjës e grisi atë”, tha Khamenei, duke iu referuar Trumpit.