Negociatorët rusë dhe ukrainas takohen në Stamboll për bisedimet e tyre të para për paqe në më shumë se tre vjet, ndërsa të dyja palët janë nën presion nga Presidenti i amerikan, Donald Trump, për t'i dhënë fund konfliktit më vdekjeprurës në Evropë që nga Lufta e Dytë Botërore. Takimi në Pallatin Dollmabahçe në Bosfor është një shenjë e përparimit diplomatik mes palëve ndërluftuese, të cilat nuk ishin takuar ballë për ballë që nga marsi i vitit 2022. Por pritshmëritë për një përparim të madh, tashmë të ulëta, u ulën edhe më tej të enjten kur Trump tha se nuk do të kishte hapa përpara pa një takim mes tij dhe Presidentit të Rusisë, Vladimir Putin. Burime të Ministrisë së Jashtme turke thanë se një takim mes zyrtarëve turq, amerikanë dhe ukrainas do të zhvillohej fillimisht, i ndjekur nga bisedime mes delegacioneve turke, ruse dhe ukrainase. Putin të dielën propozoi bisedime të drejtpërdrejta me Ukrainën në Turqi, por ka refuzuar një sfidë nga Presidenti ukrainas Volodymyr Zelenski për ta takuar atë personalisht, dhe në vend të kësaj ka dërguar një ekip zyrtarësh të nivelit të mesëm në bisedime. Zelenski tha se vendimi i Putinit për të mos marrë pjesë, por për të dërguar atë që ai e quajti një delegacion "dekorativ" tregoi se udhëheqësi rus nuk e kishte seriozisht përfundimin e luftës. Rusia në anën tjetër akuzoi Ukrainën se po përpiqej "të bënte një shou" rreth bisedimeve. Rusia thotë se i sheh ato si një vazhdim të negociatave që u zhvilluan në javët e para të luftës në vitin 2022, gjithashtu në Stamboll. Por kushtet në diskutim atëherë, kur pushtimi i ukrainës ishte në fillimet e tij, ishin thellësisht të pafavorshme për Kievin. Ato përfshinin një kërkesë nga Moska për shkurtime të mëdha në përmasat e ushtrisë së Ukrainës. Me forcat ruse që tani kontrollojnë gati një të pestën e Ukrainës, Putini i është përmbajtur kërkesave të tij të hershme që Kievi të lëshojë territor, të braktisë ambiciet e tij për anëtarësim në NATO dhe të bëhet një vend neutral. Ukraina i hedh poshtë këto kushte si të barasvlershme me kapitullimin dhe kërkon garanci për sigurinë e saj në të ardhmen nga fuqitë botërore, veçanërisht Shtetet e Bashkuara.