Drejtori i Drejtorisë Vendore të Policisë Durrës Drejtues i Parë Ervin Hodaj, së bashku me Drejtorin e Drejtorisë Vendore për Kufirin dhe Migracionin Durrës Kryekomisar Altin Lila, komunikim me mediat, për rezultatet e punës së dy drejtorive, gjatë muajit maj. Drejtori i Policisë së Durrësit, Ervin Hodaj bëri bilancin e muajit maj të punës së uniformave blu në qarkun që drejton. Sinkron hodaj - Janë evidentuar 383 vepra penale, prej të cilave janë zbuluar 382. Janë identifikuar 434 autorë të dyshuar, nga të cilët 117 janë vënë në pranga, janë kapur në kërkim 42 shtetas, 302 janë proceduar në gjendje të lirë dhe 15 janë shpallur në kërkim. Krahasuar me muajin e kaluar, janë evidentuar 136 vepra penale më shumë, ndërsa zbulueshmëria është rritur me 2 %. Janë finalizuar 10 operacione policore, si rezultat i të cilave janë arrestuar 36 persona, janë proceduar 4 shtetas në gjendje të lirë, 4 shtetas në “Arrest shtëpie” dhe janë shpallur në kërkim 3 shtetas të tjerë. Hodaj tha se operacionet janë përqëndruar në goditjen e veprimtarive kriminale në fushën e shitjes dhe shpërndarjes së lëndëve narkotike, mbajtjes së armëve të zjarrit pa leje, kapjen e personave në kërkim dhe krimi ekonomik. Si rezultat janë sekuestruar 3 armë zjarri kallashnikov, një armë gjahu, 6 armë sportive, 134 gramë kanabis, 60 gramë kokainë, 4400 euro, 92 mijë lekë, 32 celularë dhe 4 automjete.