Drejtoria Vendore e Policisë Lezhë ka bërë bilancin e punës për muajin maj. Në një konferencë për mediat, si rezultat I punës është raportuar 142 vepra penale të evidentuara dhe një nivel zbulueshmërie prej 93%. Për këto vepra penale janë identifikuar 145 autorë të dyshuar në total, nga të cilët 17 janë arrestuar/ndaluar, 113 autorë të dyshuar janë proceduar në gjendje të lirë dhe 1 autor është shpallur në kërkim. Krahasuar me muajin e kaluar, kemi 10 vepra penale më shumë të evidentuara si dhe rritje të zbulueshmërisë me 1.5 %, dhe me 6 autorë më shumë të identifikuar të implikuar. Policia njoftoi finalizimin e 6 operacioneve policore, për periudha kohore të ndryshme, ku përfshiheshin dy operacione kundër organizimit të lotarive të palejuara; dy për goditjen e kultivimit të bimëve narkotike; një kundër shitjes dhe shpërndarjes së lëndëve narkotike në afërsi të shkollave dhe zonave përreth; dhe një operacion për goditjen e tregut informal të këmbimeve valutore, kryesisht ushtrimeve pa licencë.