13 persona vdiqën dhe 2 mbetën të plagosur rëndë, pas rënies së një teleferiku në shpatin e një mali në veri të Italisë, thanë burimet lokale. Sipas të dhënave të fundit, të plagosurit janë 2 fëmijë të moshave 5 dhe 9 vjec. Njëri nga fëmijët u risoll në jetë pas një masazhi kardiak prej 6 minutash, ndërsa për tjetrin nuk jepen të dhëna të tjera. Aksidenti ndodhi në qytezën turistike Stresa, që shtrihet pranë Lago Maggiore, në rajonin e Piemontes. Pamjet e marra nga shërbimi zjarrfikës, tregojnë mbeturinat e kabinës së teleferikut, në një zonë të pyllëzuar, ku pjerrësia e terrenit e bën shumë të vështirë aksesin. Udhëtimi 20 minutësh me teleferik, lidhte Stresan me majën e malit Mottarone, në një lartësi prej 1500 metrash, nga ku turistët shijonin pamje spektakolare të Alpeve. Sipas burimeve, aksidenti ndodhi 300 metra nga maja e malit. Njëri nga kabllot u këput 100 metra nga shtylla e fundit, atje ku kabina ndodhet më larg nga toka. Që prej orës 12:30 forcat zjarrfikëse dhe ato të ndihmës së shpejtë, po punojnë për nxerrjen e trupave. Gjithashtu bëhet e ditur se një makinë zjarrfikëse u përmbys gjatë ngjitjes së malit, por nuk pati asnjë të lënduar.