Teherani e ka kryer një valë të re sulmesh raketore në Tel Aviv dhe qytete të tjera të Izraelit gjatë natës dhe mëngjesit të së shtunës. Kryeministri i Izraelit, Benjamin Netanyahu, u zotua se ushtria e tij do të ndërmarrë sulme të mëtejshme kundër Iranit në një operacion ushtarak që synon objektet bërthamore dhe ushtarake të armikut të betuar të Izraelit. Pak pas mesnate të shtunën, Izraeli tha se ushtria e tij kishte interceptuar një valë të re raketash iraniane tokë-tokë në Tel Aviv, Haifa dhe Jerusalem. Kjo është dita e dytë radhazi që Irani kryen sulme ajrore në Izraeli, si përgjigje hakmarrëse për një sulm shkatërrues që Izraeli i kreu një ditë më herët kundër objekteve të lidhura me programin bërthamor të Teheranit. "Sirena u dëgjuan në disa zona të Izraelit pasi u identifikuan raketa nga Irani drejt shtetit të Izraelit", tha ushtria izraelite. Nuk ka shenja se përplasjet e reja mes këtyre dy vendeve të Lindjes së Mesme do të ndalen. Ndërsa sirenat binin në orët e para të mëngjesit të shtunën, transmetimet e drejtpërdrejta televizive shfaqën një shpërthim të madh rreth orës 01:15 në Tel Aviv. Pamjet e mëvonshme shfaqën dëme në një kompleks apartamentesh, ndonëse hollësitë ishin të paqarta. Ushtria izraelite u bëri thirrje banorëve të qëndrojnë në strehimet kundërajrore, ashtu siç kishin bërë një ditë më parë. Rreth katër orë më vonë, ndërsa po zbardhte dita në Izrael, u raportua për sulme me raketa në disa qytete. Shumica e raketave u rrëzuan nga mbrojtja ajrore, por zyrtarët raportuan dëme në disa shtëpi. Zyrtarët thanë se të paktën tre persona janë vrarë dhe dhjetëra të tjerë janë plagosur nga sulmet iraniane në Izraelin qendror. Kjo valë e fundit bombardimesh erdhi pas një dite të vështirë me sulme ajrore nga të dyja palët. Forcat izraelite kanë vazhduar goditjet ndaj objekteve bërthamore dhe ushtarake në Iran, duke vrarë një gjeneral të lartë, zyrtarë të tjerë ushtarakë dhe shkencëtarë bërthamorë. Një nga objektivat që u godit në Iran ishte komanda e Gardës Revolucionare Islamike dhe në sulm mbeti i vrarë komandanti i Gardës, gjeneralmajor Hossein Salami, sipas zyrtarëve iranianë. Ndërkohë edhe Irani, në sulmin e tij të fundit, raportohet se shënjestroi selinë qendrore të forcave të mbrojtjes së izraelit, si edhe shënjestra të tjera ushtarake.