Rënia e lindjeve në Shqipëri po reflektohet edhe në tregun e produkteve për foshnje. Sipas të dhënave të INSTAT, gjatë vitit 2024 numri i foshnjave të ushqyera me formulë artificiale ra në 3,459, niveli më i ulët i gjashtë viteve të fundit. Në të njëjtën kohë, u ul edhe numri i foshnjave që ushqehen vetëm me gji, duke treguar se rënia lidhet kryesisht me pakësimin e lindjeve dhe jo me ndryshimin e mënyrës së ushqyerjes. Në vitin 2024 në Shqipëri u regjistruan rreth 22 mijë lindje, nga mbi 28 mijë në vitin 2019, një tkurrje prej afro 22% në pesë vjet. Me më pak foshnja, zvogëlohet edhe kërkesa për produkte si formulat e qumështit, pelenat, shishet, biberonët dhe ushqimet e specializuara. Formulat e qumështit mbeten ndër shpenzimet më të mëdha për familjet. Një kuti kushton mesatarisht 18–30 euro, ndërsa një foshnjë e ushqyer vetëm me formulë mund të konsumojë 6–8 kuti në muaj, duke e çuar koston mujore në rreth 120–220 euro. Për formulat speciale, shpenzimet mund të jenë edhe më të larta.