Në dekadën e fundit ekonomia shqiptare është orjentuar ndjeshëm drejt ndërtimit dhe administratës publike, të cilët janë zërat kryesore të rritjes së Produktit të Brendshëm Bruto, teksa baza zhvillimore e ekonomisë: bujqësia dhe industria nxjerrëse kanë ndjekur trend rënës nga viti 2013 deri më sot. Referuar të dhënave të Institutit të Statistikave, Produkti i Brendshëm Bruto në tremujorin e parë të vitit 2024 vlerësohet me rritje 3,63 % në terma realë, kundrejt tremujorit të parë të vitit 2023. Por tek kjo rritje ndikon kryesisht ndërtimi dhe administrata publike. Konkretisht ndërtimi është rritur me 1.19 për qind krahasuar me po të njëjtën periudhë të një viti më parë, dhe Administrim publik, Arsimi, Shëndetësia është rritur me 0.92 për qind. Ndërkohë bujqësia ka pësuar rënie me 0.31 për qind dhe industria nxjerrëse, rënie me 0.15 për qind. Krahasimi i shifrave tregon se në tremujorin e parë të vitit 2013 bujqësia ishte në rritje me 2.1 për qind, Industria me 4.1 për qind dhe ndërtimi kishte përsuar rënie krahasuar me po të njëjtën periudhë të vitit 2012. Ndryshimi i peshës së sektorëve në ekonomi, jo gjithmonë përputhet me kërkesën e tregut. Censi i popullsisë dhe banesave për vitin 2023, tregoi se më shumë se 350 mijë banesa janë bosh. Të dhëna, që sugjerojnë rritje artificiale të sektorit të ndërtimit dhe të papërputhur me kërkesën e tregut. Ndërkohë rënia e shënuar në bujqësi dhe industri nxjerrëse, ndikon në krijimin e një bilanci tregtar negativ, pasi diferenca me fuqisë eksportuese të vendit dhe asaj importuese po thellohet.