Një front i ftohtë që po përshkon Afrikën e Jugut që nga fundjava solli reshje të dendura bore, të cilat kanë çuar në mbyllje rrugësh, ndërprerje të energjisë elektrike dhe aksidente rrugore fatale, thanë zyrtarët. Pesë persona humbën jetën në një aksident rrugor përgjatë autostradës N2 për shkak të motit të keq, tha një zyrtar i transportit nga Kepi Lindor. Shërbimi i Motit i Afrikës së Jugut paralajmëroi qytetarët në fund të javës së kaluar se do të ketë një rënie të madhe të temperaturave këtë javë në të gjithë vendin, të shoqëruar me shira shkatërrues, erëra të forta dhe borë mbi zonat lindore. Afrika e Jugut regjistron rregullisht reshje bore gjatë muajve të dimrit, nga qershori deri në gusht, me temperatura që bien nën zero gradë. Borë është raportuar që nga e hëna në disa provinca duke përfshirë Kepin Lindor dhe Free State, duke shkaktuar mbyllje përgjatë seksioneve të autostradës që lidh provincat. Kompania e energjisë Eskom tha në një postim në platformën X se "po përballej me një numër të lartë telefonatash nga klientët në të gjithë vendin, për shkak të ndërprerjeve të mëdha të energjisë elektrike të shkaktuara nga moti i keq". Shërbimi meteorologjik i vendit parashikoi se fronti i ftohtë do të vazhdonte deri në mesin e javës.