“Ajo që ju po bëni ka potencial të jashtëzakonshëm dhe rrezik të jashtëzakonshëm”, i tha presidenti amerikan Joe Biden, shefave të Inteligjencës artificiale pasi ai u shfaq papritur në një takim me zëvendëspresidenten Kamala Harris dhe drejtuesit e katër kompanive amerikane që janë në frontin e parë të inovacioneve të Inteligjencës Artificiale.Unë shpresoj që ju të mund të na informoni për cka ju mendoni se është më e nevojshme për të mbrojtur shoqërinë dhe avancimin – i tha Biden shefave të teknologjisë. Këta të fundit u thirrën në Shtëpinë e Bardhë dhe u këshilluan që ta mbrojnë publikun nga rreziqet e inteligjencës artificiale. Sundar Pichai nga Google, Satya Nadella nga Microsoft dhe Sam Altmann nga OpenAI e kanë “detyrë morale” , sipas Shtëpisë së Bardhë, ta mbrojnë shoqërinë. Produktet e inteligjencës artificiale, si ChatGPT dhe Bard, të vëna në funksion së fundmi, kanë rrëmbyer imagjinatën e publikut. Ato u ofrojnë përdoruesve të zakonshëm mundësi për të bashkëvepruar me atë që njihet si “inteligjencë artificiale gjeneruese”, e cila mund të përmbledhë informacione nga burime të shumta brenda pak sekondave, të shkruajë prezantime, e madje edhe poezi, që tingëllojnë në mënyrë të besueshme, sikur të jenë të shkruara nga njerëz. Drejtuesve të teknologjisë, të mbledhur në Shtëpinë e Bardhë, iu tha se u takon atyre “të garantojnë sigurinë e produkteve të tyre” Ata, po ashtu, janë paralajmëruar se administrata e presidentit Joe Biden është e hapur ndaj rregulloreve dhe legjislacionit të ri për të mbuluar inteligjencën artificiale. Zëvendëspresidentja e SHBA-së, Kamala Harris, tha pas takimit se teknologjia e re mund të përbëjë rrezik për sigurinë, privatësinë dhe të drejtat civile, ndonëse, sipas saj, ka potencial edhe për ta përmirësuar jetën. Sektori privat ka “përgjegjësi etike, morale dhe ligjore për ta garantuar sigurinë e produkteve të tij”, tha ajo.