Presidenti Joe Biden pritet të prezantojë sanksione të reja mbi ekonominë e Rusisë këtë javë, sipas një zyrtari amerikan, si pjesë e masave për të forcuar përpjekjet e Kievit në luftën kundër Moskës përpara se Donald Trump të marrë detyrën. Hapat vijnë pasi administrata Biden po përgatit gjithashtu 500 milionë dollarë ndihmë të re ushtarake për Ukrainën, e cila do të përfshijë raketa të mbrojtjes ajrore, municione ajër-tokë dhe pajisje mbështetëse për avionët luftarakë F-16, tha një zyrtar amerikan. Kthimi i Presidentit të zgjedhur Donald Trump në Shtëpinë e Bardhë më 20 janar ka ndezur shpresën për një zgjidhje diplomatike për t'i dhënë fund pushtimit të Moskës, por edhe frikën në Kiev se një paqe e shpejtë mund të ketë një çmim të lartë. Këshilltarët e Trumpit kanë paraqitur propozime për t'i dhënë fund luftës në Ukrainë, e cila në mënyrë efektive do t'i dorëzonte Rusisë pjesë të mëdha të vendit ndërkohë që e ardhmja e saj do të mbetej e parashikueshme. Ndihmësit e Bidenit thonë ndërkohë se duan ta vendosin Ukrainën në pozitën më të fortë të mundshme në fushën e betejës për ti dhënë fuqi asaj në negociatat e mundshme me Rusinë, këtë vit. Nuk ka ende detaje mbi sanksionet që Biden do të vendosë në ditët e tij të fundit, por ndihmësit e tij po informojnë ndihmësit e Trumpit mbi hapat që po ndërmarrin, tha zyrtari. Ai shtoi se shumica e armëve dhe municioneve të premtuara për Ukrainën janë dorëzuar dhe pjesa e mbetur është rrugës. Qeveria e Zelenskit ka kërkuar rregullisht më shumë nga sa Biden ka qenë i gatshëm të ofronte, duke cuar edhe në takime të tensionuara private për tanket Abrams, avionët luftarakë F-16 dhe sistemet raketore ATACMS, me rreze më të gjatë veprimi. Pavarësisht se Biden fillimisht ka thënë jo për secilin prej tyre, kievi në fund i ka marrë. Por, asnjë prej tyre nuk ka sjellë përfitime të mëdha për Ukrainën në fushën e betejës.