Presidenti Biden duket se është tani i hapur për mundësinë e heqjes dorë nga fushata për zgjedhjet e nëntorit, sipas një këshilltari të lartë demokrat. Diskutimet në fakt po kryhen pas dyerve të mbyllura ndërkohë që presidenti 81 vjecar, që rezultoi me covid të mërkurën, deri më tani ka këmbëngulur se do ti shkojë deri në fund garës për shtëpinë e bardhë, pavarësisht thirrjeve të shtuara nga demokratët që ai të largohet pas dështimit në debatin e tre javëve më parë. “Ai tani është më i hapur ndaj mundësisë... Jo aq sfidues sa tregohet publikisht,” tha një këshilltar i lartë demokrat për CNN të mërkurën vonë. “Ai tani nuk thotë më “Kamala nuk mund të fitojë’, por po pyet: “A mendoni se Kamala mund të fitojë? tha këshilltari. “Është ende e paqartë se si do të përfundojë kjo, por duket se presidenti po dëgjon.” Zyrtari shtoi se bisedat e Bidenit për të ardhmen e tij janë duke vazhduar privatisht. Fushata e Bidenit, megjithatë, hodhi poshtë pretendimin se ai po rimendonte kandidimin e tij. “Nëse faktet kanë rëndësi, dhe ato duhet të kenë, një gjë është e sigurt: Presidenti Biden është kandidati demokrat dhe ai do të fitojë këtë nëntor”, tha një zëdhënës i Biden, Kevin Munoz.