Presidenti Biden duket se është kapur mat me “kopje" në takimin e nivelit të lartë me Presidentin rus Vladimir Putin, të mërkurën në Zvicër. Biden duket se mundohej t’i fshihte shënimet nga sytë e Putinit, një ish-agjent i KBG, ndërsa ata u ulën në anët e kundërta të një tavoline të vogël brenda vilës la Grange në Gjenevë. Ndërsa gazetarët regjistronin skenën, Biden shikonte letrën e tij para se ta fuste në një xhep të brendshëm të xhaketës. Skena u shpalos ndërsa dy udhëheqësit botërorë mezi u panë në sy gjatë fjalëve hyrëse që u ndërprenë nga një “sherr” midis reporterëve amerikanë dhe personelit rus të sigurisë. Kaosi kryesisht mbyti komentet e Biden, ku spikati vlerësimi "fuqi të mëdha", si për SHBA ashtu edhe për Rusinë. Biden gjithashtu pohoi me kokë pasi një reporter pyeti nëse ai kishte besim te Putini, gjë që e bëri drejtoreshën e komunikimit të Shtëpisë së Bardhë, Kate Bedingfield të postonte shpejt në Twitter, se presidenti "nuk i ishte përgjigjur ndonjë pyetjeje në veçanti, por e tundi kokën në shenjë aprovimi për shtypin në përgjithësi". "Ai edhe dy ditë më parë tha në konferencë për shtyp, ‘verifiko, pastaj beso’," shtoi ajo. Në një moment, Biden gjithashtu u shfaq i hutuar nëse do t’i bëheshin pyetje, duke pyetur Sekretarin e Shtetit Antony Blinken, "Nuk jam i sigurt se si do të funksionojë kjo. Një nga një?" Nuk ishte e qartë se çfarë thuhej në “pusullën” e Biden, por ai është fotografuar në të kaluarën duke mbajtur një tabelë me emrat dhe fytyrat e reporterëve, dukshëm të shënuar me numra që tregonin radhën më të cilën ai duhet t'i thërriste ata, gjatë konferencës së tij të parë për shtyp në mars. Gjatë asaj ngjarje të Shtëpisë së Bardhë, Biden kishte gjithashtu një letër ku shkruhej "Infrastruktura", e ndjekur nga një listë me pika dhe shënime mbi temat e diskutimit, si "Kina", "Urat" dhe Rrugët ". Por, pavarësisht nga kjo parapërgatitje, Biden përsëri gaboi, dhe tha se SHBA u rendit e 85-ta në botë për cilësinë e infrastrukturës, përpara se ta korrigjonte duke thënë e 13-ta. Pamjet: AFP