Presidenti amerikan Joe Biden ka ndryshuar dënimet e 37 nga 40 të dënuarit federalë me vdekje në SHBA, duke e kthyer dënimin e tyre në burgim të përjetshëm pa lirim me kusht. Midis tyre janë nëntë persona të dënuar për vrasjen e të burgosurve të tjerë, katër për vrasje të kryera gjatë grabitjeve të bankave dhe një që vrau një roje burgu. Në një deklaratë, Biden tha se ai dënon vrasësit dhe krimet e tyre, por shtoi se ishte "më i bindur se kurrë se duhet të ndalohet përdorimi i dënimit me vdekje në nivel federal". Vendimi i Biden vjen përpara kthimit të Presidentit të zgjedhur Donald Trump në janar, i cili rifilloi ekzekutimet federale në korrik të 2020-ës, për herë të parë që nga viti 2003. “Mos u gaboni: Unë i dënoj këta vrasës, jam i pikëlluar për viktimat e akteve të tyre të neveritshme dhe ndjej dhimbje për të gjitha familjet që kanë pësuar humbje të paimagjinueshme dhe të pariparueshme”, shtoi Biden. Tre të dënuarit të cilëve nuk u është falur jeta, janë Dzhokhar Tsarnaev, i cili ndihmoi në kryerjen e bombardimeve në Maratonën e Bostonit në vitin 2013, supremacisti i bardhë, Dylann Roof, i cili vrau nëntë njerëz me ngjyrë në Charleston të Karolinës së Jugut në 2015 dhe Robert Boëers, i cili vrau 11 besimtarë hebrenj gjatë një sulmi masiv në vitin 2018 në sinagogën Tree of Life në Pittsburgh.