Ishte një rastësi fakti që tre protagonistë u gjendën të gjithë në Pensilvani, një nga shtetet amerikane më të rëndësishëm në zgjedhjet e mesit të mandatit. Joe Biden, Barak Obama dhe Donald Trump, kanë elektrizuar anëtarësinë e partive respektive. Demokratët rrezikojnë të humbasin kontrollin e senatit, pavarësisht optimizmit të shfaqur nga Biden, i cili nga Filadelfia lëshoi një apel drejtuar amerikanëve që të shkojnë të votojnë duke patur në mendje të ardhmen e demokracisë amerikane. Joe Biden, kishte si ndihmë edhe magjinë e ish shefit të tij, Barak Obama, që në tubimet elektorale të ditëve të fundit ka dëshmuar se ka ende një karizëm të madhe për të motivuar zgjedhësit... “Këto zgjedhje janë një moment vendimtar për demokracinë amerikane”, ka thënë Biden duke iu drejtuar mijëra personave të mbledhur në amfiteatrin e Universitetit të qytetit. “Shkoni të votoni duke menduar të ardhmen e demokracisë. Fuqia e amerikës është në duart tuaja”, tha ai. Edhe Obama ka insistuar tek ajo që është në lojë në këto zgjedhje. “Të drejtat themelore, e vërteta dhe një ekonomi e drejtë janë në udhëkryq. Vetë demokracia është në lojë në këto zgjedhje”, ka thënë ish presidenti.